«ԷՅՉ–ԷՍ–ԲԻ–ՍԻ ԲԱՆԿ ՀԱՅԱՍՏԱՆ» ՓԲԸ–Ի ԱՇԽԱՏԱԿԻՑՆԵՐԸ ՇԱՐՈՒՆԱԿԱԿԱՆ ԱՋԱԿՑՈՒԹՅՈՒՆ ԵՎ ՈՒՂՈՐԴՈՒՄ ԵՆ ՏՐՄԱԴՐՈՒՄ ՀՀ ԵՐԵՔ ԿԵՆՏՐՈՆԱԿԱՆ ՄԱՐԶԵՐԻ ԵՐԻՏԱՍԱՐԴՆԵՐԻՆ ՁԵՌՆԱՐԿԱՏԻՐԱԿԱՆ ՀՄՏՈՒԹՅՈՒՆՆԵՐԻ ԶԱՐԳԱՑՄԱՆ ԵՎ ԳՈՐԾԱՐԱՐ ԾՐԱԳՐԵՐԻ ՄՇԱԿՄԱՆ ԸՆԹԱՑՔՈՒՄ
Ս.թ. փետրվարի 14-ին, Երևանում՝ «Գործընկերություն և ուսուցում»/ԳՈՒՄ ՀԿ-ի կողմից «էյչ-էս-բի-սի բանկ Հայաստան» ՓԲԸ-ի ֆինանսական աջակցությամբ իրականացվող «Զարգացման հեռանկարներ» ֆինանսական գրագիտության և ձեռնարկատիրական հմտությունների զարգացման ծրագրի շրջանակներում շահառու ՀՀ Կոտայքի, Արարատի և Արագածոտնի մարզերի 16-ից 23 տարեկան երիտասարդների մասնակցությամբ տեղի ունեցավ կարողությունների զարգացման շրջափուլի հերթական դասընթացը՝ շեշտադրելով «էյչ-էս-բի-սի բանկ Հայաստան» ՓԲԸ-ի հմուտ և փորձառու մասնագետների ուղղորդմամբ և աջակցությամբ երիտասարդների խմբերի կողմից մշակված գործարար ծրագրերի ամբողջացումը և վերջնականացումը:
Կարևորելով երիտասարդների ֆինանսական գրագիտության բարձրացման և հմտությունների զարգացման գործում միջոլորտային համագործակցության ընդլայման անհրաժեշտությունը, ինչպես նաև հմուտ մասնագետների կողմից շարունակական ուղղորդման արդյունավետությունը՝ «էյչ-էս-բի-սի բանկ Հայաստան» ՓԲԸ-ի աշխատակիցները ակտիվ ներգրավածություն ունեցան աշխատաժողովի ընթացքում՝ զուգահեռ աշխատելով երիտասրադների խմբերի հետ: էյչ-էս-բի-սի բանկի աշխատակիցները, ծանոթանալով երիտասարդների կողմից մշակված գործարար ծրագրերի նախնական տարբերակներին, դրանց իրականացման ուղղությամբ կատարված հետազոտություններին, մրցակիցների և շուկայի վերլուծություններին, ներկայացրեցին իրենց առաջարկությունները մշակված ծրագրերի արդյունավետությունը բարձրացնելու, հնարավոր ռիսկերը կանխարգելելու և վերահսկողական մեխանիզմները ամբողջացնելու ուղղությամբ: