ՇԱՐՈՒՆԱԿՎՈՒՄ ԵՆ «ԵՐԻՏԱՍԱՐԴՆԵՐԸ ՈՐՊԵՍ ՀԱՄԱՅՆՔԱՅԻՆ ՓՈՓՈԽՈՒԹՅՈՒՆՆԵՐԻ ԴԵՐԱԿԱՏԱՐՆԵՐ» ԾՐԱԳԻՐԻ ՄԵԿՆԱՐԿԱՅԻՆ ՀԱՆԴԻՊՈՒՄՆԵՐԸ
«Երիտասարդները որպես համայնքային փոփոխությունների դերակատարներ» ծրագրի շրջանակներում նոյեմբերի 1-ին մեկնարկային հանդիպումներ տեղի ունեցան ՀՀ Սյունիքի մարզի Գորիս խոշորացված համայնքի Գորիս և Քարահունջ բնակավայրերում:
Գորիսում հանդիպումը տեղի ունեցավ Գորիսի պետական համալսարանում, հանդիպման մասնակցեցին համալսարանի և Գորիսի պետական մանկավարժական քոլեջի թվով 50 երիտասարդներ: Հանդիպմանը ներկա էր նաև Գորիս համայնքի ղեկավարի պաշտոնակատար Մենուա Հովսեփյանը:
Քարահունջ համայնքում հանդիպմանը մասնակցեցին թվով 20 երիտասարդներ, ներկա էր նաև Քարահունջի բնակավայրի վարչական ներկայացուցիչ Լուսինե Ավետյանը, ով ողջունեց ԳՈՒՄ ՀԿ-ի նախաձեռնությունը և կոչ արեց երիտասարդներին ակտիվ մասնակցություն ցուցաբերել:
Հանդիպումները նպատակ ուներին համայնքի երիտասարդներին ներկայացնելու «Երիտասարդները որպես համայնքային փոփոխությունների դերակատարներ» ծրագրի նպատակը, ինչպես նաև խթանելու նրանց ներգրավվածությունն ու մասնակցությունը ծրագրին:
Գորիսում հանդիպման բացման և ողջույնի խոսքով հանդես եկավ ԳՈՒՄ ՀԿ-ի գործադիր տնօրեն Արտաշես Տոռոզյանը, նա կարևորեց երիտասարդների ակտիվ ներգրավվածությունը ծրագրին և շնորհակալություն հայտնեց ցուցաբերած մեծ հետաքրքրվածության և մասնակցության համար:
Երիտասարդներին ողջունեց նաև Գորիս համայնքի ղեկավարի պաշտոնակատար Մենուա Հովսեփյանը, նա հորդորեց երիտասադներին ակտիվ մասնակցություն ունենալ ծրագրին, համագործակցել ԳՈՒՄ ՀԿ-ի և համայնքապետարանի հետ և հնարավոր բոլոր տարբերակներով շենացնել իրենց համայնքը, հանդես գալ հետաքրքիր գաղափարներով: Նա ընդգծեց, որ Գորիսի համայնքապետարանը միշտ պատրաստ է աջակցել համայնքի զարգացմանն ուղղված բոլոր նախաձեռնությունների իրականացմանը:
Հանդիպման երկրորդ մասում ԳՈՒՄ ՀԿ-ի ծրագրի գործընկեր Երիտասարդները հանուն զարգացման հիմնադրամի ներկայացուցիչ Մարգարիտա Աչիկյանը ներկայացրեց ծրագրին մասնակցելու հնարավորություններըն ու ժամկետները:
Հանդիպումները ամփոփվեցին հարց ու պատասխաններով: Երիտասարդները հանդես եկան մեծ հետաքրքրվածությամբ և ծրագրին մասնակցելու ցանկություն հայտնեցին:
«Երիտասարդները որպես համայնքային փոփոխությունների դերակատարներ» ծրագիրն իրականացվում է Եվրոպական միության համաֆինանսավորմամբ ԳՈՒՄ ՀԿ-ի, «Հանրային խորհրդատվության և հետազոտությունների կենտրոն» ՀԿ-ի, «Երիտասարդները հանուն զարգացման» հիմնադրամի, «Աշխատանքի իրավունքի պաշտպանի (հաշտարարի) գրասենյակ» ՀԿ-ի գործընկերությամբ: